Leruleng: Limpopo
Ge dithulaganyo tša poloko di le gare di kgatlampana, bohloko bjo bo lego dipelong tša ba lapa la ga Setšhabe ba re bo gakatšwa ke maphodisa a Jane Furse ao a gogago maoto go golega bagononelwa bao ba ba latofatšwago la polao ya ngwetši ya bona.
Fridah Sechabe wa mengwaga ye masome tharo tharo, yeo a ithwelego, o tšwile ka lapeng la gagwe ge letšatši le dula thaba ka marago go ya semaušhwaneng sa kgauswi go to reka senkgwa ka la Morena, gomme a šia ngwana wa mengwaga ye mehlano ka gae. Nakong ya ge a le tseleng go boa go reka senkgwa o ile a ikhwetša a le ka gare ga mello ya dithunya moo ba lapa ba rego o ile a llelwa ke dikolo tše nne mmeleng wa gagwe.
Ka bomadimabe, Fridah o ile a neela moya ge a tsena ka dikgorwaneng tša bookelo bja Jane Furse. Go ya ka ba lapa, pele ga ge a kitimišetšwa bookelong, Fridah o ile a hlalosetja maloko a setšhaba ao a bego a mo thuša gore o thuntšwe ke mang. Ba lapa ba latofatša sephodisa sa Jane Furse gore le ge ba ba fa bohlatse bjo, ba re bona ba nyaka yeo a bonego mogononelwa yeo go tla go ba fa bohlatse bjo pele ba ka golega bagononelwa bao.
Ba lapa ba re maloko ao a setšhaba a tšhaba go fa bohlatse bjoo maphodiseng ka ge badira bošula bao go kwagala gore ba swere dithunya tše šoro gomme ba tšhogela maphelo a bona
Yo mongwe wa baetapele ba setšhaba yeo le yena a tšhabago go tšweletša leina la gagwe ka ge a tšhogela bophelo bjwa gagwe, o re bjwale ka badudi ba sa tšhošitšwe ke tiragalo yeo moo khampani ya baletadikgoro e bego e thuntšha ka ntle le go hlaola ka dithunya tša medumo ye megolo ya go šikinya le dintlo.
Tiragalo ye ya mo motseng wa Leruleng e tla ka morago ga gore ba bangwe ba badudi ba motse woo ba tsenele kopano yeo e bego e swerwe ga Seopela mo go bego go bolelwa ka go raka borakgwebo ba go tšwa dinageng di šele ka morago ga gore lesogana la mengwaga ye lesome nne a bolawe ke rakgwebo yeo e sego modudi wa naga ye.
Badudi bao ba itše go boa kopanong yeo ge ba fihla Leruleng ba ile ba bitša setšhaba ka go letša naka le go opela dikoša ba sa letetše ge setšhaba se etla ka bontšhi ka maikemišotšo a go yo fa borakgwebo bao matšatši a mabedi gore ba thote mo motseng.
Ka nako yeo ba sa opela dikoša ke ge borakgwebo bao ba šetše ba sebetšwe ka megala ke ba bangwe ba badudi gomme borakgwebo bao ba bitša khampani yeo e ba hlokomelelago dithoto gomme ge ba fihla ba letša morodi ntle le go bolela le bona. Ke moo Fridah Sechabe a kopanego le lehu la gagwe ge a le tseleng a lebile gae.
Moetapele yeo o re badudi ba sahletšwe ba sa le kgole le go fihla moo semaušwaneng sa rakgwebo yeo.
Le ge go le bjwalo, ba lapa ba lebogile mokhanselara wa ward 12 Tabane Peter Rankwe, ba mošate le ba masepela wa Makhuduthamaga bao ba thušago lapa ka tša poloko.
Fridah Sechabe o bolokwa ka moswane Mokibelo ka iri ya seswai mo mesong, gomme o šia molekani wa gagwe le bana ba bararo.
Ba lapa ba ipiletša go maphodisa a probense gore e be bona ba swarago molato woo ka ge ba latofatša maphodisa a Jane Furse ka gore ba tšhaba bagononelwa bao.
Share your stories: serunyanewz@outlook.com
